ياليتي بعير مزيون !!!

ياليتي بعير مزيون !!!

قصة مستمدة من الواقع ..وليس كان يما كان ..

4 شباب الأول اسمه عزوز ويلقب من يوم كان صغير بالوليد تيمماً بالوليد الهامور ..
والثاني عبادي ويلقب برويجح تيمماً بالمصرفي المكافح ..
والثالث سليم (ياء مشددة) ويلقب بصويلح تيمماً بابو "الأي ار تي" المتدين ..
والرابع الحميدي ويلقب بالفنان تيمماً بالفنان رجل الأعمال..

نختصر قصة هؤلاء الأربعة قدر الإمكان ونشوف وش سوى فيهم الزمن وهم في عنفوان الشباب..
طموحاتهم عالية ونظرتهم للمستقبل كانت ايجابية .. خلصوا الأربعة دراستهم
بتخصصات متقاربة وعملوا حفلة تخرج جماعية دعوا لها القريب والبعيد ..
ثم انطلقوا للبحث عن الوظيفة كحال الأخرين ..
اشترى كل واحد ملف ابو علاقي وحطوا فيه ورقة التخرج وخطاب تعريف وهم في قمة السعادة..
هذا الملف اللي سبب حالة نفسية مشابهه لحالة الأسهم لكثير من العاطلين !! ..
المهم قدموا على ديوان الخدمة المدنية وطلعوا من الديوان مستانسين خصوصاً
بعد ما سألوا الموظف متى بنتعين وكان رده هاليومين انشاالله .. وزاد عليها
بتهكم ولم يفهموا.. بس لا تروحون بعيد عشان تستلمون الوظيفة .. هم على
نياتهم وصدقوا..
المهم راح اسبوع وراح اسبوعين وراح شهر ما احد اتصل عليهم .. رجعوا للموظف
يستفسرون .. قال انتم من صدقهم قدامك ياحلوين سرى طويل جداً من سنين لو
صفيناهم بيغطون طريق القصيم وكلهم ينتظرون الوظائف تنزل !! قالوا وش الحل
قال روحوا دورو على شغل بالقطاع الخاص .. شوفوا بندة كان عندهم وظائف بألف
ومائتين بوظيفة مصفف خضار وإذا اشتغلتوا وردية ونصف (12) ساعة يعطونكم
1500 ريال !! أو سيكيورتي عند العثيم بنفس الراتب بس بدون مزايا !!
وبالفعل بدئوا رحلة البحث عن الوظيفة الضائعة .. كل يوم فاتحين ملف جديد
وتصوير من هالأوراق والشركات يقولون لهم اذا صار عندنا شواغر بنتصل فيكم
.. اللي يقول لهم هالكلام أجنبي بالطبع أو معظمهم أجانب !!!

راحت الأشهر والسنين وملوا الربع ووصلت اعمارهم مابين 27 الى 28 .. ملوا
من التقديم على الوظائف وتوقفوا وصاروا يجتمعون بملحق الوليد .. اقصد عزوز
.. وفي يوم جالسين يتذكرون الأحلام القديمة وقال عزوز (المقب بالوليد) وش
ودكم نصير الأن .. قال عبادي (الملقب برويجح) أنا ودي أصير بعير مزيون ..
سوق هالمزايين ماشي هاليومين .. انقلبت المعادلة صرنا حنا يالشيون نطر
والمزايين يخطب ودها بالملايين !! .. قال سليم (الملقب بصلوحي) انا ودي
اصير لوحة سيارة .. سمعت ان المرور يبيع اللوحات بالملايين وحنا ما معنا
مصروف اليوم يعني بالعربي طفرانين!! قال الحميدي (الملقب بالفنان) أنا ودي
اصير ابو صابر .. استغربوا ليش اخترت ابو صابر قال عندي احساس ان الدور
يبي يجي عليه ويبي يصير مزيون .. ويبي يصير اسمة حموري ويبي يصير له حنة
ورنة ..ونا مأبغى اتبهذل اخر عمري خلهم يزينونن ويدلعونن وأعيش محفول
مكفول..ضحكوا من طلب الحميدي وشر البلية ما يضحك ..قالوا وأنت يالوليد وش
ودك تصير .. قال ودي اصير لبناني .. لا تسألوني ليش !!..وإذا ما حصل ودي
أحافظ على باقي عقلي من الجنون وأحصل على وظيفة لو اصف خضار عند صاحب
بقالة الحارة كومار!!!.. وعلى فكرة يشباب كومار شاري 7 فيز وجايب سبعة
كوامير وكلهم يشتغلون .. يالله عندنا نقص عمالة .. ماعندنا الا سبعة مليون
اجنبي .. مرة شوييييييين !!!

سأل واحد منهم كم الساعة يشباب .. قال الثاني تونا 6 الصبح !.. وش ورانا خلنا نواصل احلام اليقضة لحد مانام؟

هذا هوا الواقع .. واللي عنده اعتراض يخش !!

الف تحية