قدر العندليب ...ومرحله الهضبة...وعقدة بدوى...ومطرب لكل مواطن

العندليب ........ومرحله الهضبة.......وعقدة بدوى.........ومطرب لكل مواطن

كل يومين يطلع علينا بدوى بحوار بيقارن نفسه بهضبة الغناء العربى او بيعمل راسه براسه او بيتاسفله او بيعتبره استاذه

طبعا كل ده بيدل عن انفصام واضح فى الشخصية البدويه

بس كل الناس اللى بتهاجمة او حتى مش شايفه انه بيعمل حاجة غلط مش عارفه هو ليه بيعمل كده ؟؟

من وجهه نظرى الموضوع اكبر من انه شايف نفسه

طبعا هو شايف نفسه بس مش هو ده كل الموضوع.....لان الموضوع مبدأش من زمن بدوى الموضوع بدأ من زمن العندليب

(( هذا هو قدر العندليب ))

لو رجعنا بالزمن لزمن العندليب هنلاقى انه زمن العرش الاوحد

عرش كبير لا يحتمل اكثر من عملاق

هو عملاق واحد الذى يأسر قلوب الناس

ابدعت ام كلثوم وفريد وعبدالوهاب.......بس عبدالحليم هو المعشوق الاول

العملاق اللى لا يستطيع احد انزاله من على العرش

ونهايه العملاق الفنية اللى بتسمح لشخص تانى يحل محله بتبقى بطريقتين

اما الاعتزال او نزول فى الكرف الفنى تدريجيا

وعبدالحليم اتوفى سنه 77 وطبعا الاعمار بيد الله بس لو كان استمر كان ممكن يكمل بفنه لحد 10سنين يعنى 87

(( هذه هى مرحلة دياب ))

بس بوفاه العندليب كل الناس بدأت تحلم بالعرش .

فى ناس عملت نفسها نسخ من عبدالحليم وناس بعدت عنه

بس فنها مأهلهاش انها تقود مرحلة ما بعد العندليب

والمرحله دى مثلها هانى شاكر ومحمدثروت وعلى الحجار ومحمد الحلو وايمان البحر مع احترامنا الكامل ليهم

لكن فنهم لم يكن فن المرحله ......فن مرحله التمانينات الشبابى

واللى انتزع من تحت رجليهم المرحله هو الهضبة.......

علشان يقول للناس ان اللى جم بعد عبدالحليم محطة وانا المرحلة القادمة

من فترة 83 الى 86 بدأ دياب فى وضع اساسات الهضبة

وبدأ يقعد على العرش فى 87

وبدأ يتعملق ويتعملق فى كل شريط جديد ....وكل ما يتعملق كل ما تقل الفرص فى ان حد يشاركه التالق

الى ان وصلت الامور حدها فى منتصف التسعينات من ويلومونى وراجعين ونور العين

وقتها ووقتها فقط.........علم الناس انه لا مجال لمنافسه الهضبة ...لامجال لنزع العملاق عن عرشه

وبدات مرحله جديدة فى حياه دياب وهى تاكيد ان نجم النجوم هو الاكثر تطورا فى جيله بل انه هو رجل المرحله....والباقى خلفه

فأتت البومات قمرين وتملى معالك واكتر واحد

لحد هنا الكبير كبير ومحدش يقدر يقول غير كده

الى ان ظهر جيل الشباب الحالى فى الفتره ما بين (( اكتر واحد و علم قلبى ))

وهى اول فترة غياب تزيد عن السنه فى حياه دياب

وكأنه بيقول للجيل الجديد : خدوا نفسكوا

ظهر لؤى وحماقى وبدوى وشرين وخالدسليم و واما

وبدأت تظهر القنوات الفضائية وكانت لسه بتقول يا هادى ومثلا مزيكا بدأت فى الظهور مع علم قلبى

بس تركيبة الوسط الفنى متغيرتش

الوسط الفنى قعد صامد على مبدأ : لا يصح الا الصحيح فى فتره علم قلبى و ليلى نهارى

يعنى الكبير كبير والصغير صغير

كل ده والعرش الاوحد لا يزال اوحد والعملاق عملاق بتاريخه وفنه الحالى المتميز

والاثبات ليلى نهارى

يمكن ده سبب حبى للشريط ده لأنه فيه ظهرت عضلات دياب الفنيه

كانت هناك عضلات على الغلاف.......وعضلات فنيه ظهرت فى الشريط

وعضلات نجوميه ظهرت فى ان الوطن العربى اتهز لما الشريط نزل واعلان بيبسى والكليب و اللوك و...و....

جاء الدور على جيل الشباب ومنهم تامر سابقا بدوى حاليا

قدر دياب ان العندليب توفى وترك بعده مساحه للتنافس على الخليفه الشرعى لعرش الغناء العربى

لكن قدر جيل بدوى انهم طلعوا فى وقت.. العملاق اللى قاعد على العرش اقوى ما يمكن.........اقوى من انه يهتز او انه يغلط.......ده كمان بيطور فى الموسيقى العربية وتاريخه بيكبر وفنه بيعلا

عمرو دياب كان بينافس ابناء جيله انه هو الاول

وان عرش الغناء العربى حقه

لكن جيل بدوى بينافسوا بعض وبينافسوا عملاق اصلا ظهروا فى وجوده

الفرق ان لو كان عبد الحليم فضل عايش كان دياب هيظهر برضه لأن فنه اختلف عنه

وعمل حاجة جديدة هى الاغنية الشبابية واللى هى بتتغنى لحد دلوقتى حتى من جيل الشباب

(( عقدة بدوى))

تنافس بدوى مع زملائه على الحصول على لقب الاول فى جيله طبيعى

لكن علشان عمرو هو الاول المطلق وهو الهضبه التى تعلوا الجميع

فبدأ بدوى يصاب باعراض الضغط من جميع النواحى

فهو لا يريد ابناء جيله ان يتخطوه وهو حقه

ولكنه ايضا يريد ان يجلس على العرش الذى جلس عليه عبدالحليم و الهضبه

وهو لا يمكن ابدا لان التاريخ والعطاء اقوى من اى جماهيريه لم تتعدى الخمس سنوات

ولكن ........

(( مطرب لكل مواطن ))

ما بعد ليلى نهارى ظهرت مرحله الكيانات الانتاجية والقنوات الفضائية

مرحله بشعه بكل المقاييس مرحله لا تعترف بالقواعد

يمكن لا شخص ان يقفز قفزات اقوى من قدراته و وارد ان يسقط اى فنان على عنقه رغم اصاله فنه

مرحله الكيانات الانتاجيه و احتكار النجوم و ان السنجل اقوى من اى البوم وان الكليب هو اقوى وسيله للإنتشار

مرحله اصبح فيها عبده الهربان و سوسو الحرامى بيغنوا

المرحله دى مقدرش يصمد فيها الجيل القديم (( جيل الهضبة )) بسبب انهم معرفوش اللعبه

اين فؤاد و محى وهشام عباس و مصطفى قمر وايهاب توفيق ؟؟؟؟ ضاعوا وسط الزحام

لم يصمد سوى الاول (هضبه الغناء العربى) لكنه ايضا احيط بالزحام.......

هل الاعلام حاليا بيتعامل بمبدأ ان الكبير كبير ؟؟ لأ

الاعلام بيتعامل بمبدأ :: اللى عاوز يبقى كبير يطلع فى الاعلام ويقول انا كبير

الدليل ان بدوى ايام ما كان تامر كان قبل ليلى نهارى

لأن الوسط فنى كان بيدى كل صاحب حق حقه

لكن بعد ما بقى فى مطرب لكل مواطن بدأ تامر يتحول لبدوى

عارفين ليه بسبب ان حتى الزحمه اللى حاصرت دياب الا انه لسه الاول المطلق

صحيح بدوى هو الاول جماهيريا فى جيله

لكن الهضبه هو الاول المطلق........العملاق اللذى لا يتزحزح

علشان كده هو بيقول للناس انه قريب من الهضبه مش قصده انه يبخس تاريخه

لكن بيقول انا العملاق القادم

علشان كده بدوى مخنوق ..... مش عارف يروح فين

لسان حاله يقول :: هو انا مش هجرب العرش ولا ايه

لكن كل محاولاتك هتفشل يا تيموز .....لانك جئت فى زمن الهضبه.....جيم اوفر

على السريع

الى تيموز : جرب اسمع اى اغنيه من مرحله الوسط للهضبه على سبيل المثال وهو مثال عشوائى اغنية الملاك البرئ او حاولت او يومنهم علشان تعرف ان الهضبه سبق زمنه وقدراته تؤهله للإستمرار والذهاب الى ما هو بعيد

الى دياب : ربنا يديك الصحه وطول العمر يا عملاق و عجبانى قوى سياسه التجاهل دى

الى جيل الشباب : اللى هيفكر يعمل زى بدوى هيخسر نفسه وياريت تحطوا تصريحات حماقى فى تارتاتا عن الهضبه قدام عيونكم

الى عشاق دياب : هذه المقاله خلت من اى تجريح ...... علشان منشمتش فينا الناس ....ما تيجى كلنا منغلطش فى حد علشان والله بيتحسب علينا جامد

الى الناس اللى شايفه الحياه وردى : لازم نعرف ان الزمن اتغير وان زمان كان الطفل المولود بينزل يقول عمرو دياب ..لكن دلوقتى ........وبعد الزحمه الفنية اللى بيعشها الوسط ...طبعا لسه عمرو رقم واحد بس بشكل غير واضح

احد هذه الاسباب تجاهل روتانا ....وعدم وقوف قناه فضائيه ورا الهضبه ..... لازم نعرف ان زمان حاجة ودلوقتى حاجة

وانا عارف ان دياب نفسه اخد باله ..........علشان كده هو لسه ممضاش لحد وبيفكر فى الخطوة القادمة