ميـــن اللي المفروض يبدأ ؟؟!!!

السلام عليكم

الحقيقة يا جماعة .. من فترة مش بعيدة حصلت لى مجموعة من المواقف ..كنت بقف عند كل موقف
واتأمله وكنت في النهاية بوصل لسؤال واحد.. هو المفروض مين يبدأ؟؟

المكان: احدى المدارس الاعدادية المشتركة
اللي حصل يا جماعة ان انا كنت في مدرسة اعدادية مشتركة باخد تدريب عملي تبع كليتي ( كلية التربية)
المفروض ان احنا بنروح المدرسة وبندخل نشرح للتلاميذ وبنقضي اسبوع كامل كمدرسين..
المهم كنا قاعدين انا وزميلاتي وموجهة المادة وفجأة سمعنا صوت عالي وزعيق وخناقة
في ايه يا جماعة؟؟؟.. طلعت اشوف لقيت اخر حاجة كان ممكن اتوقعها ...
مديرة المدرسة بتتخانق مع مدرس اساسي من المدرسة .. ناس هتقول عادي بتحصل ..
اه بتحصل بس مش كده ..

((ملحوظة انا جيت من نص الخناقة ))
المديرة : انت راجل قليل الادب
المدرس: وانتي ست مش محترمة
المديرة : انا هوديك ورا الشمس .. انا هعلمك الادب
المدرس: احترمي نفسك احسن لك
المديرة: احترم نفسي ايه يا ((عربجي)) يا صنايعي.
.... ((كفاية كده ))
كل الخناقة دي بسبب معلقة سكر اخدها المدرس من اوضة المديرة من غير ما يستأذنها
هي ثارت عليه وانفعلت وبدأ الاتنين سلسة الشتايم اللى شفتوها من شوية .. كل ده على مسمع
من التلاميذ وباقي المدرسين

ده كان موقف من سلسة مواقف شوفتهم جوا المدرسة وبرة ..

قال رسول الله صلى الله عليه وسلم : { من لم يرحم صغيرنا ولم يوقر كبيرنا فليس منا }
اسم المصدر: سنن الترمذي
اسم الكتاب: البر والصلة
رقم الحديث بالكتاب:1919
وقال ايضا رسول الله صلى الله عليه وسلم : { من لم يرحم صغيرنا ولم يوقر كبيرنا ليس من امتي} .
اسم المصدر: سنن النسائي
اسم الكتاب : كتاب تحرير الدم
رقم الحديث بالكتاب : 4114

سؤالي هنا .. مين اللى المفروض يبدأ وياخد الخطوة الاولى لاحتواء الموقف؟؟
مش بتكلم بس على الموظف ومديره .. كلامي كمان على الام وبنتها والاب وابنه ..
على الاخوات الكبار واخواتهم الاصغر منهم .. على اى علاقة بين اتنين واحد منهم سنه كبير
او مركزه كبير والتاني اقل منه سواء في العمر او المركز ..
انا حبيت احكي الموقف مش علشان اسأل فى الموقف ده مين غلطان ؟؟
من وجهة نظري الاتنين غلطانين .. لكن بس انا حبيت اعرض موقف
يقرب الفكرة اللى انا حبيت اناقشها معاكم .
وهى..
مين اللى المفروض يبدأ ؟؟

في انتظار آرائكم ..
تحيــــاتي للجميع ,,,