لما القــــــــــــلم ينطـــــــــــــــق ....!؟

..........

حزن القلم .. وكتب كلام تانى غريب
مش دا اللى عايز اكتبه
إيه يا قلم ؟
... مش شعرى ده
... مش خطى ده
رد القلم :
ده شعرى أنا .. وده خطى أنا
مش راح أكون البغبغان..
.. وأفضل أردد كلمتك
ألّفت وياك ألف بيت..
.. وف ألف ليل سهرتنى ..
.. وبألف آه ..... وحفظتهم
حبرى إتمزج ..
.. من دمك المليان دموع
دلوقتى من حقى أقول رأيى انا
وأهو بصراحه ...
.. من عذابك هارحمك ... لو حتى يوم
من كتر عيشتك ف الخيال
بريمه دايره ليل نهار
عمال تدور حواليك وتحفر ف الورق
يمكن تلاقى ف النهاية ... كلمه بتنور طريق
خلصت دمعك كله ما إتروت الحروف
ولا شفت طرح الخير ..
.. على قلوب البشر
قولى بقى ...
... إزاى هاتبكى و الدموع جفت خلاص ؟
وأنا عارف إنك من زمان ...
.. نفسك تعيط .. تنفجر ..
.. نفسك تبوح
لما لقيت نفسك .. واقف محلك سر
وسنين كتير عدت .. بتشوّحك بالطوب
.. وبتجرى وتفوتك
تجرى عشان يمكن ... تقدر تحصلها ...
... فبتتكفى ع الأرض
علشان عينيك نشفت
كتر السقوق فيها ... خلوك ما بتشوفشى
نفسك أكيد تبكى ..
.. على قول كتبته زمان.. ولدته بجروحك
كان كل حرف بجرح
.. مفتوح على قلبك ..
.. وبحته من روحك
عايش نهارك ليل ..
.. واحد من الخفافيش ..
.. ف النور ما بتشوفشى
دلوقتى من حقك .. الميه تصبح دم
تشرب عشان يرويك
أصله خلاص دمك ..
.. إتصفى ويا حروف .. ع الرف مركونه..
.. ويا سنين عدت
فيها عشقت كتير لبنات ما تعرفهومش
وخانوك صحاب ياما ..
.. ويا ريت بتتعلم
ووقعت فوق راسك .. من فوق سحاب انت ..
.. اللى رسمته ف خيالك
عايز أكيد تبكى
واللا بلاش إضحك
آسف .. نسيت إنك ع الضحك ما تقدر
صدرك بيتقطع من هزة الضحكه
من كتر ما إتعودت على كتمة التنهيد..
.. والصرخه من غير صوت

وبعد دا كله جيت خدتنى علشان .. تنزف كلام تانى
عايز تموت م البوح ..
.. أو تنتحر عشان كلمه تولدها
اسمع نصيحتي ... بلاش
وإسمعنى م الآخر ..
.. لو كنت ناوى تموت ..
.."شوفلك قلم تانى ".