غدر الحب !!!!!

موضوع: غدر الحب !!!!! الأحد أبريل 12, 2009 7:02 pm

غدر الحب
* سايبنى ولايف على غيرى
بعد ما تنعمت فى خيرى
سرت أبكى على حالى
واللى جرى وعذاب ضميرى

** مين قال أن أنا سيبتك
نسيتى أن السبب خيبتك
كنتِ على مدلوقه خالص
ومن كتر عشقك كرهتك

* يعنى ذنبى أنى حبيتك
وبقلبى وروحى هويتك
عملتك ملك وأنا الجاريه
وأغلى ما أملك هديتك

** أعرف منين أنى الوحيد
ومفيش زيد و لا عبيد
أنسى كل اللى كان بينا
وأبدئى حياتك من جديد

* أقسم لك وأحلف بربى
ما حد غيرك وصل لقلبى
ولا خاد اللى أنت خدته
وده كان من فرط حبى

** الحب ده فوطة وشماعة
وأنتى سايقاها خلاعة
وعلى تسوقى فى دلالك
وضميرك رمياه ف بلاعة

* أرحمنى يا سبب تعذيبى
ولوعتى ونارى ولهيبى
اللى ف بطنى بيك يربطنى
أنا قدرك وأنت نصيبى

** يا بنتى أنا بكرة دخلتى
والليلة دى فرحى وحنتى
نصيبى ال صانت عرضها
أفديها بعمرى ودنيتى

* أنت شريكى فى عملتك
قوم يلا صلح غلطتك
لأجل ما يعيش أبننا
وأعيش خدامه لجزمتك

** روحى يابنت ألعبى غيرها
شوفى واحد غيرى يشيلها
بعد أذنك عندى ميعاد
سبيها على الله يعدلها

ورحل عنها تاركا اياها للمصير المجهول والقدر
وجلست وحيدة تصارع أفكارها
ترى ماذا قالت وماذا فعلت بنفسها :

جلست أبكى من الدموع أنهار
وأسودت الدنيا فى عز النهار
ودارت ف راسى جميع الأفكار
شايلة على كتفى جبل أحجار
أندب حظى وألعن زمن غدار
أيه ذنب زمن ترعى فيه أشرار
ودخل على الليل الحالك الستار
وقاعدة منهارة والعقل أحتار
شوفت عيون أهلى تطق شرار
وصورتى فى صحيفة الأخبار
والأهل والعيلة جبت لهم العار
هو طريق واحد مالهوش خيار
واللى زيى لازم تروح ع النار
عملت وريدى دوايه للأحبار
سجلت بيه قصتى لكم تذكار
ودى أخر كلامى قبل الأنتحار
عبرة لمن يعتبر منكم يا شطار